Pemuyan Mita Ja’ Ke Pampin Palan Uman

Pengudip ngelan Adet puun sena-a'. Singket uman te ida mita Laki Malan Uman.
Cen kena ke nyat tana’, ading-ading ida ,mita ca usa ke pampin palan atau ja’ ida na’ Laki Malan Uman. Kelunan ja’ ida mita ke pampin palan, mesti ca kelunan ja’ un bali dayung, tiga adet ngan sukat kise’ mudip. Lepa ja tai re melaki me kelunan ja re. Uyan padung pelaki ne ida. Ke’ padung pelaki ja ne tai re melaki me ia. Un pulo’ usa laki lata’ tai ngkin ia ngelaki ke mudung nyeng ke uma’. Tai re abe’ ke mudung ja te, ia laki ja’ du mile’ ja ala’ ca padau ngan jeng ke belua’ pulo’ usa laki lata’ da re. Un ca usa me ida tai man padau ja ngan e mentung e dayung nyat udip tiga ngan padai tiga ke bali dayung ngan Bungan Malan. Kebaya’ dau tebada’ e ja ne nyat pelaki nai pelua’ ida.
Lepa re ta’en nai pelaki melisu cen ta’ ta’u tai te kabing ja ne nai re ule’. Tai re mung uman ke amin laki malan ja re. Lepa re uman, tai pe laki malan ja re ngan dua usa laki lata’ tai dalau ba’i nyeng ke lepo’ ka. Tai re ngkin baa ja’ ida aung man re makan isit, ki’ing, okeng, pengulong, pelaki ngan tela’o. Un dau tebada’ laki malan , bada’ me pun ngan suwi da’ ida ngelan da, ia ne ja’ pampin palan uman lepo’ uman ja. Ia bada’ pe ia ke ngening ngan baya’ dau mung-mung pengecuk to’ amen da re. Kebaya’ dau isu e, ayen bua’ amen jaet, beng tiga ne neng kelunan.

Penguman Da’ Laki Malan Uman

Laki Malan Uman ja ne laki je’ man adet palan lepo’ le dalem oman ja. Gayeng laki ji ja ne malan me lepo’ tua’ ngan nyat neng naen-naen bali. Nangen le du oyan ca lumpung me ia ngan lepo’ ne nak balun ngan penguman me ia.
Dalau le man adet puun, kado’ naen penguman da’ malan laki uman. Laki nta senteng uman penguman da uban re li’eng kuun e. Penguman da’ Laki Malan Uman nta senteng uman ja ne betelo, sengka, keleb, kabuk, telakai ngan mung kojep ne. Un pe da’ ca la’a da’ laki nta senteng uman. Uko’ baen payau. Buka ca laki ti liwa bolo tapi nta suun, kise’ laki ja nta senteng uman payau ne ja. Ca palan la’a, nta senteng uman payau ngan usa’ ngan padai mading. Buka le ala’ payau ngan usa’ dalau ajau, se’ maen ke pobo ja. Mesti tai nyat ba’a padai puun neng du ading ilu ke uman ngan payau atau usa’ ja. Nta pe ilu senteng pesak ngan uman ja ka’ amin ngan nyeng ke uma’. Co’ le tai pesak ja tai ka’ dipa uma’ te. Ka te lo’te ilu uman e. Selain penguman de’ ilu bada’ da oo re, sokat pe laki Malan Uman da uko’ baen mung naen lia ngan kojau bileng de’ ca.

Sticker Kebana

Kebana telah membuat sticker untuk dijual kepada ahli-ahlinya dan harga adalah seperti berikut;

Sticker A = RM 8.00
Sticker B & C = RM 12.00
Nak buat tempahan call 0198594492 or email raulrens@yahoo.com

Kumin Uban Badeng Pecap Bulan

Udip kelunan lata’ sena-a’, un tisen pe ida pecap bulan ngan uman. Tisen re pecap uman uban re susun ngadan kelunan da’ pampin palan uman singket uman te.De' pampin palan uman ja ne Laki Malan uman. Tapi ilu Badeng nta uban mencam pecap tau cen tading uman pa tai uman ja ko-o(Januari-December). Ngadan uman ida ala’ cen kelunan ja’ pampin palan uman ca uman e.
Ilu Badeng ne nta le uban pecap atau un bulan kua’ ngan Alo’ un bulan Januari abe’ bulan Disember. Beng bulan mading ngan bulan ule’ tua’ le anun le. Uban ilu Badeng ne pecap bulan langit. Buka bulan un ilu ta’en ke langit, ja ne kise’ bulan un. Buka bulan nta un ida ta’en ke langit nga’u, kise’ ja aeng bulan. Tapi ida un mencam pecap bulan singet alem cen kise’ bulan ja’ ilu taen ke langit.
Ca bulan ilu Badeng un kira dua pulo’ tau. Ilu Badeng pecap bulan singket alem. Ca alem ca naen pe ngadan bulan. Meka ne singket alem te baya’ kise’ tai layan bulan ja paliu. Alem tading nai bulan mading lua’, ja ilu na’ bulan Keliga’ ngan belua’ bulan dalau bulan bio’ beliling, ja ne Amet. Tai ko-o bulan la’a alem kebaya’ le ta’en bulan, ja ne Belekuweng ule’ ngadan e. Ka’i bada ngadan-ngadan bulan nga’u kuun le Badeng.
Alem tading-tading nai bulan lua, Keliga’ ngadan e. Ca alem tua’ le Keliga’. Kedua ngan ketelu alem nai bulan lua’, ja du na Belekuweng. Lepa Belekuweng, Teng Keluk ading. Lepa Teng Keluk, Teng Kateng. Teng Keluk ca alem meka pe Teng Kateng. Tapi ka’ aeng Teng Keluk ngan Teng Kateng ja ne Teng Ampan Pengang baen dau re kidi. Teng Ampan Pengang nading cen lepa du uman belua’ tau. Tau Teng Keluk ngan abe’ pa tai silep. Lepa Teng Kateng, ja ne Batek Betelo. Lepa uman belua’ tau tego’ bulan Batek Betelo, nta senteng nedeng amin baen dau re. Buka un da’ nedeng amin re dalau ja, tutung amin da’ ida uyan da baen dau re. Tau ja beng pa belua’ tau le du senteng pegayeng amin. Selikut Teng dau ngadan ja baen dau re.
Lepa Batek Betelo, Batek Salap I’ut. Lepa Batek Salap I’ut, ja pe Batek Salap Bio’ la’a. Ca alem pe ja. Lo-ong Payang I’ut lepa Batek Salap Bio’. Neng nempam Lo-ong Payang I’ut , Lo-ong Payang Bio’. Lepa Lo-ong Payang Bio’ ja ne Manuk. Manuk je ne pengejaet bulan. Nta senteng mola tego’ Manuk. Dau re bada’ e, buka le uban mola peti dalau bulan Manuk, labo’ ta’ ne olo peti ja baen dau re. Bua’ da’ ilu mola la’a un tai ngunung. Meka pe pola-pola ngan kojau da’ ca. Lepa Manuk, Tengesa’ Sek. Tengesa’ Sek ji pe dau ca bulan jaet. Nta pe tiga mola dalau ja. Beng du ngelau ne dau pola da’ ilu mola tau ja baen dau re. Buka du nta ngelau, cen pe dau tai ngesiat pola da. kena le ke tai ala’ pola da’ uban ilu mola tau ja baen dau re, ketasa’ ke uban tai du ala’ e ta’ tena ilu atau tai cen uman e ilu.
Amet lepa Tengasa’ Sek. Amet ja ne belua’ bulan. Bio’ ale’ kise’ bulan Amet. Dema idang dalau Amet, un dema ale’. Neng nempam ja la’a, Manuk. Lepa Manuk, Lo-ong Payang Bio’. Dalau Lo-ong Payang Bio’, tiga ale’ mola Opa’. Tiga ale’ dau sin opa’ da’ ilu mola dalau Lo-ong Payang. Lo-ong Payang I’ut lepa ja la’a. Lepa Lo-ong Payang I’ut, ja ne Batek Salap Bio’. Batek Salap I’ut lepa ja la’a. Lepa Batek Salap I’ut, ja Teng Kateng. Lepa Teng Kateng, Teng Keluk. Iut ne bulan keja. Kebaya’ le ta’en bulan, ja ne Belekuweng. Tai bulan ule’ ne ja baen dau re.
Ke ngetisen lan’ kumin uban Badeng ne pecap ngan uyan ngadan bulan, meki uban e. Ngadan bulan, ida ala’ cin kise’ layan bulan ja neng penaet re. Ida naet layan bulan ja uko’ kise’ ca belekuweng re, ja ne ida na’ bulan ja Belekuweng. Dalau bulan uko’ kise’ Lo-ong Payang re ida naet, ja pe ida na’ ngadan bulan ja Lo-ong Payang. Meka-meka ne ida na’ ngadan me bulan ja.