Selamat Nai Meno' blog e'.

Selamat pegita ka-ang ilu Oko, Amai, We', Seken, Sadin, anak ngan Toyang alai layan, oban sokat nai meno' blog e' liwai ji. Ading-ading ake' ti tega tawai oban oba' nai naat kise' dau senorat e' ngan pepo pekimet ngan ne' dalem blog e' ji. Blog e' ji un kado' naen bahagian keneng poyan udip de' lapa, naat ne dau kidi ngan bada' boka un dau tira' de' sala' neng idi ngan kua' kua' pilu peteneng udip tega ka-ang ilu serepe' apan. Nyiau udip alai layan apan boka le tai petego' ca liwai laa limun kanan.

Tega Tawai.

Amaitebun

Isnin, Disember 15, 2008

Asat Buau Cin Long Musang

Tading du un ngelamun buau, ja ne cin tahun 1973. Ntaun awai re pelua’ kimet me lepo' dalau ja. Ida miting buau la’a uman 1976. Un lo’te kado’ da’ uba’. Un dau isu palai, “Kelunan da’ ngimet buau la’a, se’ re uba’ ketai ketua Kampung ne puyan ja’ meka ja.” Perintah pe nta uba’ lo’te pe. Buau ja nta tai palup uman ja.

Tego’ bulan 9 uman 1977, un palai nai naban ka’ Hospital Kapit. Kimet de uba’ kenai ule’ abe’ Long Musang lo’te. Tape’ ida peput ka’ pasen Belaga uban sungai iut. Pengemajan sungai iut, dalem dua bulan uman 1977. tai liyen ne ida telu panak. Dalau re sio’ liyen, ida tai mutu penguman ke’ Lepo’ Sekapan. Kado’ palai Sekapan uba’ pebeli tana’ mida. Pelapa ida telu un meli tana’ ka’ Sekapan ka’ Long Dungan ngan mola koda’-koda’ naen pola. Nai re jual e ka’ pasen Belaga. Puyan ja uyan ca peniga mida baen re. Tiga pe ida da’ nai naban cin Long Musang ngan anak sekulah. Mung ida na’ puyan ida telu un tiga. Meka ne nai re ngepit-ngepit.
Tego’ denga ida telu abe’ pala’ lepo’ bio’ ka’ Long Musang, ida telu nai bekebun baen dau re telu. Un dau lepo’ bio’, kuma ida tai buau. Un palai na’ surat me Perintah Opis Belaga. Puyan ja lua’ me Perintah, ida kuma e buau. Kedua re mipa dau Perintah, “Buka em kuma ame’ buau, tiga lo’te ja. Ame’ buau ne pe side’. Apan ame’ ayen ke sio’ penusa ka’ Long Musang beleh kuda’-kuda’ uman la’a. Uban udip ka’ Long Musang un tusa uban co’ ale’ cen pasen ngan kubo’ taban.

Sio’ tanggal 9hb 3 uman 1978, Perintah na’ ca ukum baet mida telu. Ca usa ukum $26.00 ligit ngan cuk ida telu cap ujo’ ke buau. Kelamun buau cin uman 1973 abe’ 1976 ja pe palup tego’ uman 1977. ida da’ nai buau, tai dena’ ka’ Long Dungan dalem uman 1980. cap jiwa re 1500 usa. (un palai bada’ 1800 usa uban kado' de' tai peselai).

Dalem asat buau re cin Long Musang un kado’ naen-naen pengeten. Tiga dalem ngalut ka’ sungai ngan tepa penguman. Tape’ mung re un dalem puyan ja’ tiga-tiga. Dalau Badeng nai buau cen Long Musang, nai ka’ Long Dungan, un palai kira-kira pulo’ lubang amin ngeline ka’ Batu Keling. Ida de' ngeline' ka' Batu Keling ja ne Peban, Pelajung, Unchang(amai Laka'), Lek(amai Philip), Lenchau(amai Kuing), Pejating, Petanyit, Pekarak, amai Lian, Along(amai Lerin) ngan amai Akem. Ida tai buau pemung ngan Kayan ka’ Batu Keling 1980-1984. Ca uma’ dado' re pemung ngan Kayan ka' Lepo'. Tapi nta majan re telu mudip ka, un penusa pe ida ngan Kayan. Uban penusa ja atek maen lan ja nai re telu kelap cen Batu Keling nai ngan du ka’ Long Dungan tahun 1984.