Selamat Nai Meno' blog e'.

Selamat pegita ka-ang ilu Oko, Amai, We', Seken, Sadin, anak ngan Toyang alai layan, oban sokat nai meno' blog e' liwai ji. Ading-ading ake' ti tega tawai oban oba' nai naat kise' dau senorat e' ngan pepo pekimet ngan ne' dalem blog e' ji. Blog e' ji un kado' naen bahagian keneng poyan udip de' lapa, naat ne dau kidi ngan bada' boka un dau tira' de' sala' neng idi ngan kua' kua' pilu peteneng udip tega ka-ang ilu serepe' apan. Nyiau udip alai layan apan boka le tai petego' ca liwai laa limun kanan.

Tega Tawai.

Amaitebun

Jumaat, Disember 05, 2008

Penganut Kristen Long Busang

Tading udip ka' Long Busang 1970an, lepo' ilu lepa un masuk agama Kristen. Udip masuk Kristen nading cen ida de' tai peselai dalau udip lepo' ilu ka' Long Betao sena-a'. Dalau udip lepo' ilu Badeng pemung ngan Lepo' Tau ka' Alo Kayan sena-a' ja ne tading du un pet adet ngayau. Un dau de' Lata' serita e, dalau mung bangsa-bangsa daleh Long Nawang Meeting ka' anun paren Lepo' Tau. Dalau du Meeting ja, un oban lepo' Tau mentang mung tekaing ulu lepo Jalan tipo oseh kata du petira'. Un kira Tuen daleh ja je' ngkin ida petira' dalau ja. Mung paren/ketua Lepo' da dau petira'. Un tepo-o, ketua lepo' Jalan ja re ia nta oba' petira'. Un dau Tuen daleh ja kia, "uban u o' nta oba' petira' nta patut du nak iko' ketua dau e. Un dau e, tekaing ulu oko me' di de' ngkin ake' nta mencam teka' ke petira' dau e. Cen tau ja ne dau Tuen daleh ja cuk lepo' tau da nutung mung tekaing ulu da re ngan perintah cuk du dalem daleh ja nutung mung tekaing ulu ngan nepeng mung Belawing adet du. Cen ja re ne du Nepeng Belawing Lepo' ilu ka' Long Nawang. Un tepo-o masih kado' lepe du ngelan palan adet Bungan.
Un ida de' nai peselai ka' Alo Baliu, ida de' ading ngelan Tuhan. Nai lepo' ilu buau abe' Long Busang ja kenai Pendita Tageng mete' adet ja ke' lepo' ilu. Sementara ja, nai pe Adet Islam ke' lepo' ilu dalau ja re. Un kira-kira tulat dua dau lepo' ilu ngelan Kristen ngan Islam dalau oman 1974 ja re. Dalau nai du nginjil ida, un pekalai nyorat ngan baca ne ida. Lepa re mencam baca ngan nyorat, kado' pe de' tai sekolah Injil. Ida ne de' Gembala-gembala ilu naki ne uko' baen Pastor Tam Along, Amai Rossa, ngan kado' de' ca ake' nta tisen ida mung.